الجرح اليماني

حلمي اللي ماوصل ساحل عيوني
                      لا مسك حبل الامان ولا لقاني
ضاع في غبة محطاّت الجنوني
                  لين روض الشوق امحل بالمحاني

والحنين اللي توطّن في لحوني
                   في شتات القلب مع غربة زماني
ابتلعني يوم خانت بي ضنوني
                      ثم قذفني ساحل الجرح اليماني

الله اكبر وش بقا لي يا شجوني
                      يجهل افوادي ولا يبخن مكاني
مااذكر الضحكه تدّنت يم سنوني
                       والصبر ابن ٍ مع همي نساني

غربتي طالت وحملي في متوني
                      وحدتي صحرا تعرّيني اغاني
ديرتي اهلي و ربع ٍ صادقوني
                     عافيه من روّحت والموت جاني

دمعتي عذرا تستر في جفوني
                     عن عيون الناس قاصيها و داني
ما تحب اتشوف دمعة من وفوني
                      او فرح في  وجه عدوان ٍ تراني

لو شربت من الضما ما جف لوني
                   لو حويت الحب ماظنه ااحتواني
مو بشرط احب حتى يزين كوني
                         يا قبح كوني وانا عاشق أناني

اوفي ب حبي يلو هم يغدروني
                      وان يهيج الموج ما خنت المواني
جيتهم وادري بهم ما ينطروني
                        لجل اقول اني وفيت لمن هواني

فارد اضلوعي وهم بس يجرحوني
                     اغمض اجروحي وعين الله تراني
صرختي  مخنوقه ف لاهب طعوني
                      واحترق غصن المحبه في كياني

قمت الملمني واشدشد في غصوني
                         والبس اثياب السعاده والاماني
واتعكز بالامل و اقول هوني
                      يا مصايب ماني  ب اهل الهواني
و دام لي ربٍ كريم ما قووني
                         كالجبل شامخ وثابت في مكاني