بنت الزعفران

لو بعد لي في حياتي بس ثواني
               ما رجا قلبي سوا ريمٍ هواها
جنتي في دنيتي واغلا  أماني
         يالله أن تكتب فرح عمري معاها
اذكرتني والحزن فل ونساني
         والفرح في مهجتي حل ف دماها
ربّعة في عرش قلبي وف جناني
      واصل ب دنيا الهوى لعلا سماها
مااحتوتني غير بنت الزعفراني
         بالادب والدين والذوق احتواها
حسنها لا هو فراتي لا يماني
             بالحلم ما شفت والله بحلاها
نادره الفاتنه نبع الحناني
       ازعل الدنيا لاجل اكسب رضاها
باشة الحسن المبجل والغواني
              يسلم الملحد اذا صدفه رآها
من غلايه باعت الدنيا عشاني
        وان تبي روحي تجيها من غلاها
حبها وشلون تاسعه المحاني
           لو نثرته ع السما يمكن ملاها
لين غابت والضياع بكل كياني
           اشحذ افراح الليالي في رجاها
خبروها العيد من مر ما لقاني
         وان تباطت علم موتي هم جاها
لو تهب ارياح عثرات الزماني
        والله أن تبطي ولا تمحي غلاها
يا جفاها حزن بالخافق رماني
            لو تشيله قمة طويق" فناها
الشعر وليا حضر باجزل معاني
      ما يوصف جروحي بغيبة دواها
يا عذاب القلب يااحلا التهاني
        جعل روح" تنسيك ربي نساها
البلا لو كنت مقهور وتعاني
         والالم حاصر مراكبك ونفاها
شامتك جالس على سيف المواني
    ولاقدرت تقول روحك وش بلاها
تضحك وحزنك على طرف اللساني
     دمعتك لو مال رمشك طاح ماها
ذا بلاي و لو بعمري بس ثواني
         ما بغيت إلا التي قلبي معاها