عايد مرزوق العويس

ياللي تعينون الزمان فبلاويه
ماأنتــم قرابه لو تقولو قرابه

وقت الرخا كل ٍبقربك مماشيه
ووقت الشدايد مافتح شخص بابه

ويا وقت لاواني ولاني بلاويه
كل يوم والثاني مجهز طلابه

حتى الحبيب اللي احبّه وشاريه
وضيّعت عمري في مطارد سرابه

اللي أخذ قلبي وروحي بياديه
وللحين اصد اسهامه بكل رحابه

سبعة سنين عاشق" كل مافيه
لا والله إلا احب حتى ترابه

راح وتركني بين الاحزان والتيه
تبكي على حالي عيون السحابه

اثر الهوى (جبار) وايذل راعيه
وايعيـّـشــه بين الحزن والكآبه

تلعب به امواج الوله في شواطيه
ترميه للذكرى ويكبر مصابه

واثر الغلا من يدهل بصدر غاليه
ينعاف كله من سبايب عذابه

يااجروح قلبي رببعي في محانيه
واتبختري ماني بناشد وآبه

متعود" ع الحزن وابخص معانيه
ولااعتدت ابث لغير رب ٍ نهابه

مأركض ورا المقفي ولااحب طاريه
لو كان جنة دنيتي باقترابه

واللي لاجل جنسيتي قال مابيه
لابوه لابو مــن لهم قيل لابــه

اجروح؟ قلبي فيه عمر ٍ يكفّيه
وشلي بناس ٍ ما تعرف الذرابه

ياهيه ماني هيه لو قلت ياهيه
لابو غرام ٍ حد بالقلب نابه

انا ابدوي وافخر باصلي و اعلّيه
واهيم بالصحرا واحب الربابه

اليا حضرت الشعر زانت قوافيه
والـجزل شعره حاضرٍ في غيابه

مثلي اذا بدل دياره واراضيه
يبقى على نهج النبي والصحابه

انا سليل المجد ساسه وراعيه
من صلب وايل مكرمين الذيابه

اليا ندهت الطيب جاوب يا لـبّـيه
واسمي نقشته بالذهب في كتابه

من شفت صار الكون غاب ف مباديه
فضلت اعيش انسان في وسط غابه

ومن خان زيزوم الوفا في مخاويه
خاويت بنت القافيه والكتابه

وارتحت من كثر العتب والمشاريه
يومي تركت الظن واللي مشابه

ومحبوب قلبي لي زعل واجب ارضيه
واحطه ف عيني واقدر جنابه

وكانه يظن آذل بقفاه ما اجيه
اخسر غلاه و لا خسرت المهابه

و اللي طعن فيني ابضحك واخلّيه
شامخ و رمـياته تزيدن صلابه

من يجهل القرناس والحر يشويه
و من عاتب الجاهل خسر في عتابه