شهيده النقاب

اعذروني فان البؤس يؤلمني لدرجة ان الحزن المدقع داخل القلب يكتبني ولا أكاد أقوى منازعته
.
.
إليكم مع الحب
.
دثريني دثريني يا البتول
                             ماتت العزه ولا طاب المقيل
الشعر في هالزمن صابه خمول
                          والحكي واجد وبعطيك القليل
العقل بين التشرذم والذهول
                           والظهر محني ولا يقدر يشيل
نشحذ الهمه من ايدين الذبول
                         والجفاف ايحدنا صوب الرحيل
كبرت الصحرا وضيعنا الذلول
                          ذلنا دق العظم سيف/ن صقيل
ابلشونا بالخوارج و السلول
                           ابلشونا بين أبو جهل و عميل
ضاعت الغيره ومخطوره تزول
                        و العرب اعقولها ...حبات هيل
لبسيني شيلتك وشعاد اقول
                              دمنا كل يوم متعود يسيل
اصبحت للرقص دقات الطبول
                            وين فزعة ثار دمك يا قتيل
الحصان اليعربي تمبل كسول
                          سيفنا من قش مايحمي دخيل
العدا كل يوم في شكلٍ و زول
                         للفتن في هالوطن تشعل فتيل
ثم تمادو واشتموا حتى الرسول
                    والضمير اليعربي يرجف هزيل
مظلمه والغيم ما حوله هطول
                   وارعدت ثم امطرت وانشق ليل
حدرت من السما وضحا جفول
                       لفت الليل وغدا الأسود جميل
انثرتهم بالهدوء و بالفضول
                          جففتهم خوف قلب السلسبيل
علمتنا كيف ازهار الحقول...
                     تطعن الطلقات في ساقٍ نحيل
وكيف ان اليأس مخرج للنزول
                      من صمل بالحق دق المستحيل
وكيف ان الموت ما يعني افول
                     الشجاعه تقصر الخوف الطويل
ما تذب حجابها بنت الاصول
                       شامخه مثل الجبل عيّت تميل
هلهلي لي علي فرحك يا بتول
                        ولا عليك ليا نبح كلب و هبيل
قصريني لو غدا للظلم طول..
                        واقطعيني لو غدا هالفكر ذيل
فيضيني بالامل مثل السيول
                      وازرعيني بالصبر قلب النخيل
و قولي الامه تزل و لا تزول
                      تنجب الأبطال من جابت هديل
.
‫#‏هديل_الهشلمون_شهيده_النقاب