ويلان من يقوى على حرب ويلان

يسعد صباح اللي لهم بالغلا شأن
من لابةٍ ترهب جميع الخصومي

ويلان من يقوى على حرب ويلان
حتى الشجاع يقول ماهو لزومي

ضامي لقا والشعر بالجوف غدران
اتحزمي  يابنت فكري و قومي

عايد يصيح الشوق من كثر الاحزان
ما عاد في صدري صديقٍ كتومي

كن السّهر رمحٍ طعن طفل الاجفان
ينزف ارق يطعن معاليق نومي

وكن خافقي يوسف وحظي له اخوان
من وين ما وجهت زادت همومي

والله لو ضيمي على اجبال عمّان
في حفنة همومي بتهدل و تومي

ايسوقني وقت الرخا سوق بهتان
لكن وانا عايد فلا شان يومي

رافع حجاج واضحك بوجه ولسان
ما بان حزني للردا والرّخومي

وانا سليل منيف من قوم شجعان
أحميد يا ناشد عن علوم قومي

فدعان شجعانٍ على القوم قومان
وي الصّديق سيوف نفزع وشومي

من شفت شان الوقت لي بال ماشان
انطحت موج الغرب واعرف اعومي

روّضت أمواج البحر مثل قبطان
و قزّرتها ما بين رومي و رومي

لكن وحقّ اللي رفع سبعة اجنان
ااصد عن درب الحرام واشومي

لابت في ملهى ولا اصبحت سكران
ولا خالطت ريح العفونه هدومي

اخاف من ربٍ على العرش سبحان
واحفظ صلاتي وان غدت زدت صومي

ما شفت مثلي طير من دون جنحان
طار و تعلا فوق ذيك الغيومي

عايش بصحرا لو حواليّ بستان
اضحك و دمع بوجنتي زاد لومي

مبطي وحزني خانق الصدر للان
من ينقذ الاحزان من صدر يومي

ياابنيتي والشعر مو بحر واوزان
الشعر لو هز القلوب الرحومي

جاك السلام و مقصد الهرج قد بان
والشّعر يفضح خافيات العلومي