ما يقتلك يا كود طعنة ولد عم

ما يقتلك يا كود طعنة ولد عم
                       والا الصحيب ليا غدر في صحيبه
لي صار في مجفاك يشتمك ويذم
                           ابعـد عنه واترك رشاه وجليبه

عزاه يا قلب بهالوقت الاضلم
                         لي زاد جرحك من يدين" قريبه
يقنب على جرم الهواجيس والهم
                          لا قلّ هوجاســــه و زايد قنيبه

يا ذيب ما عينت لك ذيب" اطخم
                         يبرك على صدر" تقل فيه ذيبه
عريت لك ظهر وقبل تطعنه سم
                         خل طعنتك تجزا الفؤاد و تعيبه
واعاهدك ما تسمع لصرختي فم
                            إلاّ بـيـوم الحشر حقي باجيبه

الجرح موت الجرح لو ما نزف دم
                      نزفه دفين و ضاق صدر المصيبه
يا دمعتي لا تشمتي وارتـقـي يم
                       قولــة كـفـو عند الرّجـال المهيبه
ويا خطوتي لا تعثري كالجبل شم
                       طعنات حظك والزمن مو غريبه

و يا جفن وشلك ع السهر ريّح و نم
                         في هالزّمــان الكل ياخذ نصيبه
الطّيب يثمر طيــب لو تربته سم
                         شق الظلام و شع نوره و طيبه
و الشيـن شينه فاح لو عام  ينطم
                          خان العهود ولا وفا مع حبيبه
طال المسار و ريحة الجرح تشتم
                   والشعر اخرس وان صرخ بان عيبه