عايد مرزوق العويس

طوّلتها و المسأله هي قصيره
                              ماهي بحاجه  منك كل هالتفاكير

وعسرتها بس ليه دنيا يسيره
                              كن غايتك تزرع فؤادي مسامير

تزعل بلا سبه ليالي كثيره
                          اضحك وتضحك لك سنين المعاسير

اليا متى والعين رمدا سهيره
                              و دروبنا تشكي بعيد المشاوير

وليا متى ونعيش هم ٍ وحيره
                              نغلط و نشتم حضنا والمقادير

اتعبتني و الحب بيدك مصيره
                       واحرار صبري في شباكك مكاسير

كرهتني نفسي و حالي خطيره
                         والشخص يشري صحته بالدنانير

يا صاحبي بعطيك فرصه اخيره
                              فرصه ولا تقبل بايات تاخير

ارجع  على قلبك وشاور ضميره
                         اما وصل والا عسى هالجفا خير