اشتقت لك يلعن ابو من يصدك (( مسحوب ... مستفعلن مستفعلن فاعلاتن ))

اشتقت لك يالعنبو من يصدك
                               والله يجازي من يفكر يعاديك
اليا متى صكّات بقعا تصدّك
                            والروح مهره رسنها في اياديك
اعاهدك للموت قلبي يودّك
                         وان طال هجرك يالغلا ما اجافيك
لو ينقطع حبل الوصل مااهدك
                        وان باعتك دنياك بالروح لأشريك
العمر لك وانت روحي أعـدّك
                         و اقرب من الحنا لكفّك أحس فيك
اود من ودّك وأضد من يضدّك
                          وأتنفسك وأذوب في لمسة ايديك
أموت لو دمعه تمر جال خدّك
                          وافرح اذا الفرحه تجيك وتحييّك
ياللي بظلم الروح وصّلْت حدّك
                              يبغيك قلبي يا بعد كل مبغيك
والله لو ما العيب لآبوس يدّك
                            وأقول كافي ابعاد يرحم اهاليك
عذّبتني بالصّد يا رحْم جدّك
                             كافي تجنّي يا حبيبي وتشكيك
أقرب ولا تبعد فؤاد ٍ يودّك
                          ما كل يـوم اتْلاقي انسان يغليك