ادري تبيني طاغي الشوق حدّك
وتدري بقلبي هايمٍ فيك يبغيك
اعاهدك للموت قلبي يودّك
وان طال هجرك يالغلا مااجافيك
لو ينقطع حبل الوصل مااهدّك
وان باعتك دنياك بالرّوح لأشريك
هيهات اهدّك وانت روحي أعدّك
واقرب من الحنّا لكفّك أحس فيك
اودِّ من ودّك وأضد من يضدّك
وأتنفسك وأذوب في لمسة ايديك
الموت لو دمعه تمر جال خدّك
والعيد لا شفت السّعاده تحييّك
مير ل متّى صكّات بقعا تصدّك!
والروح مهره رسنها في اياديك
والله لو ما العيب لآبوس يدّك
وأقول كافي بعد يرحم اهاليك
عذّبتني ما بين جزرك ومدّك
وغرّبت عن دار المحبين طاريك
واشتقت لايّامك ومزحك وجدك
ياغايب ماغبت عن بال غاليك
أقرب ولا تبعد خفوق ٍ يودّك
ما كل يـوم اتْلاقي انسان يغليك
ليست هناك تعليقات:
إرسال تعليق